Isreal iravuga ko iri kugenzura umurwa mukuru wa Iran
Igisirikare cya Israel, IDF, cyatangaje ko kiri kugenzura byuzuye ikirere cy’umurwa mukuru wa Iran, Tehran.
Ibi bitangajwe nyuma y’iminsi ine ibihugu byombi bikozanyaho, mu bitero byatangijwe na Israel mu rukerera rwo ku wa 13 Kamena 2025.
Ibi bitero Israel yagabye kuri Iran, byahitanye bamwe mu basirikare bakuru bayo barimo n’umugaba mukuru w’ingabo za Iran, Maj. Gen. Hossein Salami.
Nyuma y’ibi bitero, Iran yahise itangaza ko itakwicara ngo iceceke nyamara yashotowe. Bidatinze mu masaha make yahise usubiza Isreal, iyigabaho ibitero bikomeye mu murwa mukuru Tel Aviv.
Amakuru mashya avuga ko ibitero Israel yarashe kuri Iran mu ijoro ryakeye, byaguyemo abandi basirikare bakuru babiri ba Iran, biyongera ku bandi bapfuye mu cyumweru gishize.
Israel yatangaje ko mu ijoro ryo ku Cyumweru tariki 15 Kamena 2025 yarashe ibirindiro by’umutwe wa Iran Revolutionary Guards Corps ukaba ari na wo ukomeye kurusha indi mu ngabo za Iran.
Itangazo Ingabo za Israel zasohoye ku wa 16 Kamena 2025, rigaragaza ko indege z’intambara za Israel zarashe uduce 10 twakoreragamo ingabo zo mu mutwe wa Quds (IRGC), twategurirwagamo ibitero bigabwa kuri Israel.
Iminsi ibaye ine ibihugu bya Israel na Iran birimo kurasana bikomeye umunsi ku munsi mu bitero benshi bavuga ko byagizwemo uruhare na Leta Zunze Ubumwe za Amerika, yahoze ihigira kurasa Iran ikaba yarabicishije muri Israel.
