Bizafasha leta kurinda abimuwe mu byabo: Ibyatangajwe na RDC nyuma yo gusinyana na AFC/M23

Amasezerano ngenderwaho y’amahoro yasinyiwe i Doha, ku buhuza bwa Leta ya Qatar, hagati y’intumwa za Leta ya Repubulika Iharanira Demokarasi ya Congo (RDC) n’iza AFC/M23, afatwa na Kinshasa nk’intambwe ikomeye mu rugendo rwo gushaka amahoro arambye, arimo ubutabera kandi afatika mu burasirazuba bw’igihugu.

Ibi byatangajwe na Guverinoma ya Congo kuri uyu wa Gatandatu tariki ya 15 Ugushyingo, amasaha make nyuma y’uko ayo masezerano asinywe, nyuma y’ishyirwaho rya gahunda yo gukurikirana no kugenzura ishyirwa mu bikorwa ry’ihagarikwa ry’imirwano.

Nubwo iyi ntambwe nshya itavugwaho rumwe mu banyapolitiki n’abandi baturage bamwe babona ko ishobora guteza ikibazo cy’uko ntacyo bihindura ku bibazo biri mu gihugu, guverinoma ivuga ko amasezerano-ngenderwaho ya Doha ashyiraho urufatiro rw’inzira igamije guhagarika imirwano burundu, kugarura ububasha bwa Leta no gushyigikira umutekano w’igihugu. Yongera kugaragaza ko yiyemeje gushyira amahoro, umutekano n’agaciro k’abaturage ba Congo ku isonga ry’ibikorwa byayo. Congo yavuze ko bizafasha leta kurinda abaturage, cyane cyane abagore, abana n’abimuwe mu byabo nk’ikibazo cy’ingenzi gihangayikishije leta.

Itangazo rya Minisiteri y’Itangazamakuru n’Ubunyamabanga bw’Ibiro bya Minisiteri rivuga ko “Amasezerano azakomoka kuri aya masezerano-ngenderwaho azatuma habaho umutekano mu nzira z’inkunga z’ibikorwa by’ubutabazi, korohereza imiryango mpuzamahanga yita ku bantu kugera ahari ibibazo no gutangira ibikorwa byihutirwa bigamije gufasha abaturage bahungabanyijwe n’ibibazo”.

Aya masezerano-ngenderwaho agizwe n’amasezerano umunani ariyo:

• Gahunda yo kurekura imfungwa (yasinywe ku ya 14 Nzeri 2025);

• Gahunda yo kugenzura no kwemeza ihagarikwa ry’imirwano (yasinywe ku ya 14 Ukwakira 2025);

• Uburenganzira bwo kugera aho ibibazo biri n’ubutabera;

• Kugarura ububasha bwa Leta, impinduka mu miyoborere n’imiyoborere ishingiye ku baturage;

• Gahunda z’umutekano w’agateganyo n’uburyo bwa DDR (Kwamburwa intwaro, Gusezererwa mu ngabo no Gusubizwa mu buzima busanzwe);

• Ubwenegihugu, indangamuntu, gutaha no gusubiza impunzi n’abimuwe mu byabo;

• Kuzahura ubukungu n’imibereho myiza;

• Ubutabera, ukuri n’ubwiyunge.

Guverinoma ivuga ko andi masezerano atandatu asigaye, uretse ayo amaze gusinywa, azaganirwaho nyuma y’ibyumweru bibiri uhereye ku munsi hasinyweho amasezerano-ngenderwaho. Ibyo biganiro bigamije gushyiraho uburyo nyirizina bw’imikorere, ingengabihe ndetse n’inshingano z’impande zombi.

Guverinoma yongeyeho iti “Nta kuguma mu buryo busanzwe bishoboka niba tugamije amahoro: uyu murongo watangiye ugamije gushyiraho mu buryo bwihuse uburyo bw’impinduka ziboneka kandi zisuzumika ku baturage bahanganye n’ibi bibazo. Guverinoma ishimira Leta ya Qatar uruhare rwayo muri iki gikorwa, Leta Zunze Ubumwe za Amerika, Umuryango wa Afurika Yunze Ubumwe n’Umuhuza, Nyakubahwa Faure Gnassingbé, ku bwo kudufasha.”

Itangazo risozwa ryongeraho ko amahoro, umutekano n’iterambere ry’abaturage ba Congo biguma kuba ingenzi kuri guverinoma, izakomeza gukorana “mu mwuka w’ibiganiro, inshingano no kubaka ubwiyunge bw’igihugu”, mu rwego rwo kurinda no gushimangira ubumwe, ubusugire n’ubutaka bwa Repubulika Iharanira Demokarasi ya Congo.

Mbere y’aya masezerano, intumwa za guverinoma n’iza AFC/M23 zari zasubiye guhura i Doha ku buhuza bw’umuhuza mu rwego rwo gushaka umuti ku bibazo by’umutekano mu burasirazuba bw’igihugu. Nyuma y’iki cyiciro cya gatandatu, ku wa Kabiri tariki ya 14 Ukwakira 2025, impande zombi zari zemeye amasezerano yo gushyiraho itsinda rihuriweho ryo kugenzura ihagarikwa ry’imirwano.

Intego y’umuhuza n’impande bireba ni uguhagarika intambara, bakemerera ibiganiro kubanza gutera intambwe igamije gusinyana amasezerano y’amahoro no gushyira mu bikorwa ibyumvikanyweho.

Izi ntambwe za dipolomasi zirakorwa n’impande zombi mu gihe buri ruhande rukomeza gushinja urundi ko rwarenze ku masezerano yo guhagarika imirwano.