IBUKA yavuze ku mwanzuro w’urukiko wo kutohereza Kabuga mu Rwanda
Nyuma yuko urugereko rwa IRMCT (MICT) rukorera i La Haye mu Buholandi rwanzuye ko Félicien Kabuga uregwa ibyaha bya Jenoside yakorewe Abatutsi mu 1994 adashobora gukora urugendo, umuryango we uvuga ko wiruhukije, Umuryango uharanira inyungu z’abarokotse Jenoside, IBUKA wo ukaba uvuga ko uko amagara ye yifashe biramutse bihindutse yakoherezwa mu Rwanda.
Urugereko rwa IRMCT (MICT) rwasigaye ruca imanza zasizwe n’urwari urukiko mpuzamahanga rwashyiriweho u Rwanda rwa ICTR (TPIR) rwafashe uwo mwanzuro ku wa gatanu, nyuma y’impaka zimaze imyaka irenga ibiri hagati y’ubwunganizi bwe n’ubushinjacyaha.
Félicien Kabuga aregwa ibyaha birimo gushishikariza rubanda mu buryo butaziguye gukora Jenoside yifashishije Radio-Televiziyo, RTLM bivugwa ko yari abereye perezida-fondateri. Imbere y’urukiko, Félicien Kabuga yateye utwatsi ibyaha aregwa arihanukira abyita ibinyoma.
Ubwo yatangazaga umwanzuro w’urukiko ku wa gatanu, umucamanza ukuriye iburanisha, Umunya Écosse, Iain Bonomy yavuze ko nyuma yo gusuzumana ubwitonzi, urugereko rw’iburanisha rwemera ibimenyetso by’akanama k’inzobere zigenga, rukaba rwanzuye ko Félicien Kabuga adashobora gukora urugendo rwo kujyanwa mu Rwanda.
Donatien Kabuga, umwe mu bana ba Kabuga, yabwiye BBC News mu butumwa bwanditse ko icyemezo cy’urukiko bacyakiranye kwiruhutsa kwinshi, nyuma y’imyaka yari ishize hari inkeke yo kohereza umubyeyi wabo (Kabuga) mu Rwanda.
Yagize ati: “Birumvikana ko twabyakiranye na soulagement nyinshi nyuma y’imyaka ya menace yo kumwohereza mu Rwanda. Twabyakiranye kandi n’icyizere yuko umubyeyi wacu ufite imyaka ikabakaba 93 ibihugu abana be turimo by’ino mu Burayi bizemera kumwakira vuba nkuko abacamanza babisabye.”
Philibert Gakwenzire, umukuru w’Umuryango IBUKA urengera inyungu z’abarokotse Jenoside, yabwiye BBC kuri telefone ko bamenye icyo cyemezo cyafashwe n’ubucamanza ko Kabuga atakora urwo rugendo, ariko ko igihe byagaragara ko yakora urwo rugendo yarekurirwa mu Rwanda nkuko ubushinjacyaha bwari bwabibagejejeho.
Mu kwezi kwa Gatandatu (Kamena) 2023, Gakwenzire yari yabwiye BBC ko IBUKA yatunguwe kandi ishegeshwa kurushaho n’icyemezo urukiko rwari rwafashe icyo gihe ko Kabuga adashobora gukomeza kuburanishwa kubera ko amagara ye ameze nabi.
Abashinjacyaha bari bakomeje gusaba ko Kabuga yakoherezwa mu Rwanda nk’Igihugu avukamo kandi cyonyine kugeza ubu cyemeye kumwakira nyuma yuko urukiko rutegetse ko arekurwa by’agateganyo kuko amagara ye ameze nabi.
Umuryango wa Kabuga hamwe n’abunganizi be bo bakomeje kuvuga ko kumwohereza mu Rwanda byahonyora uburenganzira bwe ndetse ko biteje inkeke ku mutekano we.
Félicien Kabuga ufatwa nk’umwe mu bacurabwenge ba Jenoside yakorewe Abatutsi akomoka mu cyahoze ari Perefegitura ya Byumba, ubu ni mu karere ka Gicumbi, Intara y’Amajyaruguru. Uyu mugabo wari umwe mu baherwe b’u Rwanda mbere ya Jenoside yakorewe Abatutsi, ni umwe mu bateye inkunga ndetse agashishikariza gukora Jenoside aho amakuru yemeza ko ari we waguze imihoro yakoreshejwe mu kwica Abatutsi.
![Mu nama ya kane y’urwego rw’umutekano ruhuriweho n’u Rwanda na Repubulika Iharanira Demokarasi ya Congo [JSCM], haganiriwe ku cyiciro cya kabiri cy’ibikorwa bigamije kubahiriza amasezerano y’amahoro yasinyiwe i Washington DC harimo n’ingingo yo gusenya FDLR. JSCM igenzurirwamo intambwe zimaze guterwa zishingiye ku masezerano y’amahoro ibihugu byombi byagiranye ku wa 27 Kamena uyu mwaka. Abinyujije kuri X, kuri uyu wa 21 Ugushyingo 2025 , umujyanama wa Perezida wa Leta Zunze Ubumwe za Amerika mu bufatanye na Afurika, Massad Boulos, yavuze ko impande zombi zarebeye hamwe intambwe imaze guterwa mu kubahiriza amasezerano y’amahoro yashyizweho umukono ku wa 27 Kamena 2025, i Washington. Zanasuzumye uko ibikubiye muri gahunda y’ibikorwa igamije kurandura burundu umutwe wa FDLR n’imitwe yitwaje intwaro byubahirizwa. Intumwa zitabiriye ibiganiro zirimo iz’u Rwanda, RDC, Qatar na Togo ifatwa nk’umuhuza wagenwe n’Umuryango wa Afurika Yunze Ubumwe na Komisiyo ya AU. Muri Nzeri 2025 byari byatangajwe ko ingamba zose zigamije kugarura amahoro hagati y’u Rwanda na RDC zigomba gushyirwa mu bikorwa bitarenze impera za 2025.](https://www.rotorovizeri.com/wp-content/uploads/2025/11/20250709102625000000-eb88b-800x450.jpg)
