USA: Inteko Ishinga Amategeko yemeje itegeko ryo gutangaza amadosiye y’umuherwe Epstein
Abadepite n’Abasenateri b’i Washington bumvikanye ku cyemezo gisaba Minisiteri y’Ubutabera ya Leta Zunze Ubumwe za Amerika gushyira ahagaragara amadosiye ajyanye n’umuherwe Jeffrey Epstein, ukurikiranyweho ibyaha by’ihohotera rishingiye ku gitsina.
Mu Nteko Ishinga Amategeko, Abadepite 427 batoye bashyigikiye iryo tegeko, umwe gusa ni we waritoye ararwanya. Muri Sena ho, iryo tegeko ryemejwe mu buryo bwihuse nta gutora ku mugaragaro.
Iri tangazo rije nyuma y’iminsi mike Perezida Donald Trump ahinduye imvugo, agasaba ko amadosiye ya Epstein yatangazwa, nyuma y’igitutu cy’abamushyigikiye babisabaga ku mugaragaro.
Icyumweru gishize, izina rya Trump ryasubiye mu itangazamakuru nyuma y’itangazwa ry’impapuro zirenga ibihumbi 20 ziganisha kuri Epstein, zimwe zikanamuvugamo. Ibiro bya Perezida (White House) byahakanye ko nta cyaha Perezida yakoze.
Depite Clay Higgins wo muri Leta ya Louisiana ni we wenyine utarashyigikiye iryo tegeko, avuga impungenge ko gutangaza ayo makuru bishobora kubabaza abantu b’inzirakarengane.
Uko Trump yahinduye umuvuno atungura benshi i Washington, byanakoze ku mitima ya bamwe mu bayobozi b’Abarepubulikani bari bamaze igihe baramushyigikiye mu kurwanya iryo tangazwa.
Perezida w’Inteko Ishinga Amategeko (Speaker), Mike Johnson, yari yaravuze kenshi ko gahunda yo gusohora amadosiye ya Epstein ari “amayeri y’abademokarate” nta shingiro agira.
Icyemezo cyari cyitezwe ko kizamara iminsi mike mbere yo kugera muri Sena ya Amerika, ariko nyuma y’itora ryatangiye mu masaha y’umugoroba mu Nteko Ishinga Amategeko, gahunda yahise yihuta cyane.
Umuyobozi w’Abatavuga rumwe n’ubutegetsi muri Sena, Chuck Schumer, yazanye iryo tegeko mu cyumba cya Sena akoresheje uburyo buzwi nka unanimous consent (kwemeranya nta kurwanya). Kubera ko nta n’umwe warwanyije iryo tegeko, ntihabayeho impaka cyangwa kongeramo andi mavugurura.
Itegeko rirakurikira inzira rinyura muri Sena rigahita rijyanwa ku meza ya Perezida, aho biteganyijwe ko azarishyiraho umukono rikaba itegeko.
Nubwo iryo tegeko ritowe, ntibyasabaga ko Inteko itora kugira ngo amadosiye asohorwe – Trump ubwe yari ashobora gutanga itegeko ryo kuyatangaza.
Iryo tegeko risaba Minisitiri w’Ubutabera, Pam Bondi, gushyira ahagaragara amadosiye yose atari ibanga, inyandiko, ubutumwa bwo mu kazi ndetse n’ibindi bikoresho by’iperereza bifitanye isano na Epstein n’uwari umufatanyacyaha we, Ghislaine Maxwell, bitarenze iminsi 30 iri tegeko ritangiye gukurikizwa.
Ayo makuru arimo ubutumwa bwo hagati mu bashinzwe ubutabera, amadosiye y’ingendo z’indege, n’urutonde rw’abantu cyangwa ibigo bifitanye isano na Epstein.
Ariko kandi, iryo tegeko rihabwa n’uburenganzira bwo guhagarika gutangaza amakuru ashobora kubangamira iperereza rikiri gukorwa cyangwa ashobora gutangaza amazina y’abahohotewe.
![Mu nama ya kane y’urwego rw’umutekano ruhuriweho n’u Rwanda na Repubulika Iharanira Demokarasi ya Congo [JSCM], haganiriwe ku cyiciro cya kabiri cy’ibikorwa bigamije kubahiriza amasezerano y’amahoro yasinyiwe i Washington DC harimo n’ingingo yo gusenya FDLR. JSCM igenzurirwamo intambwe zimaze guterwa zishingiye ku masezerano y’amahoro ibihugu byombi byagiranye ku wa 27 Kamena uyu mwaka. Abinyujije kuri X, kuri uyu wa 21 Ugushyingo 2025 , umujyanama wa Perezida wa Leta Zunze Ubumwe za Amerika mu bufatanye na Afurika, Massad Boulos, yavuze ko impande zombi zarebeye hamwe intambwe imaze guterwa mu kubahiriza amasezerano y’amahoro yashyizweho umukono ku wa 27 Kamena 2025, i Washington. Zanasuzumye uko ibikubiye muri gahunda y’ibikorwa igamije kurandura burundu umutwe wa FDLR n’imitwe yitwaje intwaro byubahirizwa. Intumwa zitabiriye ibiganiro zirimo iz’u Rwanda, RDC, Qatar na Togo ifatwa nk’umuhuza wagenwe n’Umuryango wa Afurika Yunze Ubumwe na Komisiyo ya AU. Muri Nzeri 2025 byari byatangajwe ko ingamba zose zigamije kugarura amahoro hagati y’u Rwanda na RDC zigomba gushyirwa mu bikorwa bitarenze impera za 2025.](https://www.rotorovizeri.com/wp-content/uploads/2025/11/20250709102625000000-eb88b-800x450.jpg)
