U Rwanda na Maroc byasinye amasezerano y’ingenzi

U Rwanda n’Ubwami bwa Maroc byasinye amasezerano y’ubufatanye mu bya gisirikare, agamije gushyiraho urufatiro rukomeye rwo guteza imbere umubano w’ingabo no gutegura ubufatanye bwagutse hagati y’ibi bihugu byombi.

Aya masezerano yasinywe ku itariki ya 18 Kamena 2025, mu ruzinduko rw’iminsi itatu rw’akazi rwakozwe na Minisitiri w’Ingabo w’u Rwanda, Juvenal Marizamunda, mu Bwami bwa Maroc.

Nk’uko byatangajwe na Minisiteri y’Ingabo, uru ruzinduko rwatangijwe n’igikorwa cyo gushyira indabo ku mva ya Mohammed V, mu rwego rwo guha icyubahiro umurage w’amateka n’ubuyobozi bw’indashyikirwa bw’umubyeyi washinze Ubwami bwa Maroc.

Ku munsi wa mbere w’uruzinduko kandi habayeho inama y’icyiciro cyo hejuru hagati y’intumwa z’u Rwanda n’iz’igihugu cya Maroc, iyobowe na Abdeltif Loudyi, Minisitiri ushinzwe ubuyobozi bw’ingabo z’igihugu muri Maroc.

Iyo nama yabereye ku cyicaro gikuru cy’Ubutegetsi bw’Ingabo za Maroc.

“Ikiganiro cyibanze ku gushimangira ubufatanye mu bya gisirikare,” nk’uko byatangajwe na Minisiteri y’Ingabo.

Umunsi wasojwe n’ikorwa ku mugaragaro ry’amasezerano y’ubufatanye mu bya gisirikare hagati ya Guverinoma y’u Rwanda na Guverinoma y’Ubwami bwa Maroc.

Aya masezerano y’amateka ashyiraho urufatiro rukomeye rwo gukomeza umubano w’ingabo no gufungura inzira y’ubufatanye bwagutse mu bijyanye n’umutekano n’inyungu rusange z’ibihugu byombi.

“Uru ruzinduko ni intambwe ikomeye mu mubano w’ingabo z’u Rwanda na Maroc, kandi rugaragaza umuhate usangiwe wo kwimakaza amahoro, umutekano n’iterambere ry’impande zombi,” nk’uko byongeye gutangazwa na Minisiteri y’Ingabo.

U Rwanda na Maroc bimaze imyaka myinshi bifitanye umubano mwiza mu bya dipolomasi.

Kugeza mu 2019, ibi bihugu byombi byari bimaze gusinya amasezerano 36 y’ubufatanye, arimo agenga ubucuruzi, kurengera ibidukikije, ubucukuzi bw’amabuye y’agaciro, ubutabera, ubufatanye mu by’amategeko, n’iterambere ry’imbaraga z’abantu.