FPR Inkotanyi igiye gutangiza ishuri rya politiki
Umuryango wa FPR Inkotanyi wasinyanye amasezerano n’Ishyaka ry’aba-Communistes (Chinese Communist Party, CCP) riri ku butegetsi mu Bushinwa agamije gushimangira ubufatanye bw’impande zombi mu gusangira ubumenyi mu bijyanye no kubungabunga ingoro ndangamuco n’amateka, ndetse no gushinga ishuri rya Politiki mu Rwanda.
Aya masezerano yashyizweho umukono mu muhango wabereye muri Intare Arena ku ya 20 Kamena 2025, imbere y’abayobozi bakuru b’amashyaka ku mpande zombi.
Intumwa za CPC zari ziyobowe na Honorable Hao Huijie, uyoboye itsinda riri mu ruzinduko rw’akazi mu Rwanda.
Amasezerano agamije gushinga ishuri rya Politiki mu Rwanda, yashyizweho umukono ku ruhande rw’u Rwanda na Protais Musoni, Umujyanama Mukuru w’Umunyamabanga Mukuru wa FPR, Wellars Gasamagera.
Iri shuri rya FPR n’irya Party School rya CPC bizajya bihanahana ubumenyi n’amahugurwa y’abanyamuryango mu bijyanye na Politiki ndetse no guteza imbere inzego z’Ishyaka.
Andi masezerano ni ay’erekeye n’imicungire y’Ingoro ndangamuco n’amateka no guhanahana umuco, yashyizweho umukono n’Umuyobozi w’Inteko y’Umuco, Ambasaderi Masozera Robert.
Aya masezerano yombi yasinywe ku ruhande ry’Umuryango wa FPR Inkotanyi na CPC, yahagarariwe n’Umunyamabanga Mukuru w’ishyaka, Wellars Gasamagera ari kumwe n’abandi banyamuryango bakuru ndetse n’intumwa z’ishyaka riyoboye u Bushinwa (CPC) ziyobowe na Hon. Hao Huijie.
Impande zombi zagaragaje ubushake bw’ubufatanye burambye bushingiye ku ndangagaciro zihuriweho ndetse no mu murongo mugari w’iterambere. Ubu bufatanye kandi bugaragaza umubano ukomeza gutera imbere kandi ushingiye ku bitekerezo n’ubufatanye bw’inzego z’amashyaka yombi.
Ishyaka rya gikominisiti riyoboye u Bushinwa (CPC) risanganywe umubano n’Umuryango FPR Inkotanyi ndetse ibihugu byombi bisanzwe bifitanye ubufatanye n’umubano w’igihe kirekire mu by’ubukungu, iterambere n’ibindi.
Uretse kuba FPR Inkotanyi na CPC bihuriye ku kuba ari amashyaka ayoboye ibihugu abarizwamo, ni n’amwe yagize uruhare runini mu rugamba rwo kubohoza ibihugu byayo.
