RwandAir yahagaritse ingendo za Qatar na Dubai
Sosiyete Nyarwanda ikora ubwikorezi bwo mu kirere, RwandAir, yatangaje ko yasubitse ingendo ziva n’izijya i Doha muri Qatar zari ziteganyijwe ku wa 23 na 24 Kamena 2025 bitewe n’uko icyo gihugu cyafunze ikirere cyacyo.
Itangazo rya Rwandair rivuga ko yanahagaritse by’agateganyo ingendo ziva n’izijya i Dubai .
Yakomeje ivuga ko haza gutangwa amakuru niharamuka habaye impinduka y’uko ibintu byifashe. Abagenzi bagizweho ingaruka, bashobora guhinduza amatike yabo bagafata indi tariki.
Iyi sososiyete yiseguye ku bo izi mpinduka ziri bugireho ingaruka.
Ibi bibaye nyuma y’uko ku mugoroba wo kuri uyu wa Mbere, Iran yatangaje ko yagabye ibitero bya missile ku birindiro by’Ingabo za Amerika zirwanira mu kirere bya Al Udeid muri Qatar.
Ibi birindiro by’ingabo byitwa US Al-Udeid Air Base amakuru aravuga ko misile esheshatu zabashije kubigwaho nyuma yaho Qatar yakoresheje ubwirinzi bwo mu kirere bwayo irasa misile zivuye muri Iran.
