Vestine aricuza amahitamo ye mu rushako, aca amarenga ko atagishishikajwe n’umubano
Umuririmbyi w’indirimbo zo kuramya no guhimbaza Imana, Ishimwe Vestine, yagaragaje amarangamutima yuzuyemo agahinda n’ukwicuza ku mubano we n’umugabo we Idrissa Jean Luc Ouédraogo, ashinja ko yamubeshye akamushyira mu buzima atigeze yifuza.
Mu butumwa burebure yanyujije ku mbuga nkoranyambaga ze, by’umwihariko kuri Instagram, mu rurimi rw’Icyongereza, Vestine yagaragaje ko abayeho ubuzima butamushimishije, avuga ko yahisemo nabi, ariko akizeza ko bitazongera.
Yagize ati: “Ubuzima mbayeho uyu munsi si bwo nahisemo. Ndi mu bihe bitoroshye kandi si ibyo nkwiye. Ndemera ko nagize amahitamo mabi mu buzima, ariko nize isomo. Nta mugabo uzongera kumbeshya ngo anyangirize ubuzima.”
Yunzemo ko ubutaha azitondera amahitamo ati: “Ninjya guhitamo uwo tuzabana, azaba ari umuntu tuziranye bihagije, menya umuryango we n’ubuzima bwe bwose. Nta muntu uzongera kunkoresha ukundi.”
Ibimenyetso byinshi byagaragaje ko uyu mubano ushobora kuba uri mu marembera, birimo no kuba Vestine yasibye amafoto yose agaragaza we n’umugabo we kuri Instagram.
Ubu arabarizwa muri Canada, aho yari amaze iminsi mu rugendo rw’ibitaramo byabereye mu mijyi itandukanye, bikaba byarangiye mu mpera z’iki cyumweru.
Vestine na Jean Luc bakoze ubukwe ku wa 5 Nyakanga 2025, nyuma yo gusezerana imbere y’amategeko no kugaragaza urukundo rwabo ku mugaragaro.
Nubwo IGIHE dukesha iyi nkuru yagerageje kumuvugisha kuri ibi bivugwa ntibyakunze, biracyari gukurikiranywa byimbitse kugira ngo hakazatangazwa andi makuru asobanutse mu minsi iri imbere.
